பிரான்ஸ் பாராளுமன்ற உறுப்பினரிடம் யாழ் மாநகர முதல்வர் விடுத்துள்ள முக்கிய கோரிக்கை.

பிரான்ஸிற்கு விஜயம் மேற்கொண்டுள்ள யாழ் மாநகர முதல்வர் விஸ்வலிங்கம் மணிவண்ணன் தலமையிலான குழுவினரும் பிரான்ஸ் பாராளுமன்ற உறுப்பினரும், பிரான்ஸ் நாடாளுமன்ற செயலாளருமாகிய ஜோன்ஸ் பிரான்சுவாவை சந்தித்து கோரிக்கை விடுத்துள்ளார்.

நேற்றைய தினம் (02) பிரான்ஸ் நாடாளுமன்ற செயலாளரை விஸ்வலிங்கம் மணிவண்ணன் சந்தித்து இந்த கோரிக்கைகள் விடுத்துள்ளார்.

இதன்போது கருத்து தெரிவித்த யாழ்.மாநகர முதல்வர் விஸ்வலிங்கம் மணிவண்ணன்,

நாங்கள் உங்களிடம் இரண்டு கோரிக்கைகளை முன்வைக்கின்றோம், ஒன்று தமிழ்மக்கள் மீது மேற்கொள்ளப்பட்ட கட்டமைக்கப்பட்ட இனப்படுகொலைக்கான நீதியினைப் பெற்றுதருவதற்கு பிரான்ஸ் துணை நிற்கவேண்டும் என்றும் 30 வருட போரின் காரணமாக அழிக்கப்பட்ட எமது பிரதேசங்களை மீள கட்டியெழுப்புவதற்கு தேவையான உதவிகளை வழங்கவேண்டும் என்றும் கேட்டு கொண்டார்.

தற்போது இலங்கையில் நிலவும் பொருளாதார நெருக்கடி நிலையில் இலங்கைக்கு உதவி வழங்கும் நாடுகள், அமைப்புக்கள், தமிழருக்கு நீதியான, சுயநிர்ணய உரிமையுடன் கூடிய, சமஸ்டி முறையிலான, ஆட்சி அதிகாரத்தினை சிறிலங்காக அரசு வழங்கவேண்டும் என்ற நிபந்தனையுடன் தான் நிதி உதவிகளை அளிக்கவேண்டும் என்றும், அதற்கான அழுத்தங்களை பிரான்ஸ் பிரயோகிக்க வேண்டும் என்றும் கேட்டுக்கொண்டார்.

இக் கலந்துரையாடலின் போது கருத்து தெரிவித்த பிரான்ஸ் நாடாளுமன்ற செயலாளார் ஜோன்ஸ் பிரான்சுவா,

நாங்கள் இலங்கையில் இடம்பெற்றது இனப்படுகொலை என்பதனை ஏற்றுக்கொள்ளுகின்றோம் என்றார்.

பிரான்ஸ் நாடாளுமன்ற கட்டிடத்தொகுதியில் நடைபெற்ற இச் சந்திப்பில் நாடாளுமன்ற உறுப்பினரும் பிரான்ஸ் நாடாளுமன்ற செயலாளருமாகிய ஜோன்ஸ் பிரான்சுவா, யாழ்.மாநகர முதல்வர் விஸ்வலிங்கம் மணிவண்ணன், நல்லூர் பிரதேச சபைத் தவிசாளர் மயூரன், யாழ்.மாநகர சபை உறுப்பினர் வரதராஜன் பார்த்திபன் ஆகியோர் கலந்து கொண்டனர்.