கணவனை கோடாரியால் தாக்கி கொலை செய்த மனைவி - மனைவி மற்றும் மாமியார் அதிரடி கைது.

மதுபோதையில் தினமும் வீட்டில் தகராறை ஏற்படுத்தும் கணவர் மீது அசிட் வீச்சு தாக்குதலை நடத்தி, கோடரியால் வெட்டிக்​ கொன்ற மனைவி மற்றும் மாமியார் விளக்கமறியல் வைக்கப்பட்டுள்ளனர்.

சந்தேக நபர்களை இந்த மாதம் 20ஆம் திகதி வரை  விளக்கமறியலில் வைக்குமாறு, இரத்தினபுரி பதில் நீதவான் பிரியங்க குணவர்ணசூரிய உத்தரவிட்டுள்ளார். சம்பவத்தில் இரு பிள்ளைகளின் தந்தையான 35 வயதுடைய நபரே இவ்வாறு உயிரிழந்துள்ளதுடன், 31 வயதுடைய அவருடைய மனைவியும் 52 வயதுடைய மாமியாரு​மே கைதுசெய்யப்பட்டுள்ளனர்.

நேற்று முந்தினம் 8ஆம் திகதி இரவு 8.30 மணியளவில் உயிரிழந்த நபர் மதுபோதையில் வீட்டுக்கு வந்துள்ளதுடன், கையில் வைத்திருந்த கத்தியுடன் மனைவியுடன் தகராறு செய்துள்ளார். இதன்போது தனது தம்பியின் வீட்டுக்கு உயிரிழந்தவரின் மனைவி சென்ற நிலையில், அவர் அங்கேயும் சென்று தகராறு செய்துள்ளார்.

இதனையடுத்து ஆத்திரமடைந்த மனைவி தனது கணவன் மீது அசிட்டை ஊற்றி தம்பியின் வீட்டிலிருந்த கோடரியால் தாக்கியுள்ளார். சம்பவத்தில் காயமடைந்த நபர் இரத்தினபுரி போதனா வைத்தியசாலைக்கு கொண்டு செல்லும் வழியில் உயிரிழந்துள்ளார்.

இந்நிலையில், சந்தேகநபர்களான தாயும் மகளும் குருவிட்ட பொலிஸ் நிலையத்தில்  சரணடைந்த நிலையில் நேற்று இரத்தினபுரி பதில் நீதவான் பிரியங்க குணவர்ணசூரிய முன்னிலையில் ஆஜர்படுத்தப்பட்டபோதே அவர்களை விளக்கமறியலில் வைக்க நீதவான் உத்தரவிட்டார்.